羅志祥港騷講明唔預鐵粉姜濤　自爆原因勁無奈


台灣舞王羅志祥（小豬）明年將於香港舉辦演唱會，相隔8年後再來港開騷，令粉絲極為期待，早前佢現身鐵粉、男團MIRROR成員姜濤嘅個人演唱會，做對方嘉賓，已令港迷興奮尖叫。今次佢假亞洲博覽館舉行演唱會，全場8,400個位，被視為試香港水溫之舉。


聽日（27日）小豬演唱會公開發售門票，不過尋日（25日）佢就特地喺社交平台宣布壞消息，原來佢係講明今次個騷將唔會邀請姜濤做嘉賓，因為小豬演唱會同MIRROR自己個演唱會時間非常接近，所以對方未能出現喺佢個騷，所以先決定特意發文，同姜濤嘅粉絲說明清楚，同時等想睇小豬嘅粉絲可以成功買到飛。