叱咤我最喜愛的男女歌手落在張敬軒及陳蕾手上。撇除軒公力敵鏡仔兼砌低網民話要推上台嘅「光B」，撇除欣宜休息一年造就陳蕾攻頂，由樂迷投票嘅獎項落在2位「我來自廣州」嘅歌手，就有另一層意義。


－香港歌手北上搵食多到數唔到，但南下嘅廣州歌手寥寥可數。早喺陳蕾未出世之時，亞視搞嘅「未來偶像爭霸戰」出過一位來自廣州嘅冠軍李達成。當時亞視立即幫李達成出碟，但喺香港反應麻麻，畢竟當年冇網路，口味品味仍然會有差異。不過80年代喺香港出道過，已經足夠令李達成衣錦還鄉，據說佢係1988－90年廣東省最受歡迎男歌手，3場廣州體育館個唱爆滿。


－ 之後嘅廣州之光已經係張敬軒。相隔十幾年，內地青年已經漸漸摵甩土味，張敬軒起碼好運過李達成，至少拎到香港娛圈入場券。周杰倫陶喆掀起嘅華語樂壇R&B風潮，即使去到《酷愛》已經近乎水尾，但係勝在「難道愛愛愛愛情已死心」夠入耳，加上當時陳奕迅大戰古巨基嘅戲碼都玩咗好幾年，天時地利人和之下跑出。


－ 張敬軒嘅作品其實保留好多粵語流行曲傳統，包括旋律、格式甚至廣府話嘅字正腔圓。反觀有新一代香港歌手出過post話「要字正腔圓不如聽朗誦」……


－ 至於陳蕾，參加完當時聲勢勁過《超級巨聲》嘅《亞洲星光大道》之後，難免要效力亞視。而你諗都冇諗過，當年被評審認為有機會成為「新一代搖滾女歌手」嘅豹哥，曾經做過亞視麻雀遊戲節目嘅主持助理，又稱花瓶。


－亞視當時話事人要藝員準時朝早返公司上堂培訓（導師係高志森），否則即炒。當時嘅陳蕾窮到一個點，係冇錢坐的士，要踩單車返亞視上堂，仲因此體力透支暈低而上報，算係另一成就。同日本唱片公司簽約再解約之後，陳蕾有一段時間以文青波希米亞look拍片自彈自唱，個妝濃到慘不忍睹，數埋數埋都好大疊黑歷史。陳蕾正式以《娛樂人生》「重返」香港音樂圈，我嘅感覺係「佢居然冇走」。


來自同一城市以外，張敬軒同陳蕾嘅新人年，都冇喺叱咤拎過生力軍獎項。甚至佢地做新人時代都捱過下：張敬軒喺廣州跑校園show贏取知名度，其中一個學生聽眾就係陳蕾。而豹哥一度要整手作維持生計。2個人都選擇「逆流而下」堅持留喺香港發展，最終都成功生還，而家亦唔使拍抖音片整古做怪。


－ 我唔認為張敬軒開山劈石先至令陳蕾跑出，因為張敬軒成功之後，Paco簽下嘅廣州實力女唱將李悅君都係喺香港無功而還。


－ 反而陳張2個人不約而同示範咗一個外來人身份如何參與香港演藝圈，基本條件就係唱得，所以尋晚你聽到佢2位帶全晚最有水準嘅現場演繹。另一個殺著就係令外界認知，佢地喺音樂以外亦係個有趣的人 － 軒公係全行最識玩社交媒體嘅藝人，一份早餐出個post已經知佢咩料。而陳蕾應該係全行唯一電競女歌手。


－ 張敬軒得獎感言提到「我作為一個廣州人，喺香港打拼左23年，好多謝大家由接納我到相信我。今晚呢個獎項，我覺得係呢個城市俾我嘅一個blessing，亦都係一個信任。2024年我會帶着呢個獎項去報答呢個城市嘅人」。而主持介紹陳蕾時就提到佢用作品關懷社會，豹哥亦都話要將歌曲獻俾想放棄生命嘅人。2個廣州人以唔同方式去到同一個目的地，方式不盡相同，但就證明咗黎明金句之一嘅道理，就係「繼續做，你做到之後就會知道係用咗咩方法」。而呢度嘅人，對任何善良、願意融入而且同熱愛這片土地嘅人，係會用自己方式支持，不管你來自東南西北。