姜濤個人演唱會《姜濤Keung To "Waves" In My Sight》今日(3日)舉行第二場，嘉賓是謝安琪(Kay)與張繼聰，令大家大感驚喜！姜濤今晚個唱門票一度炒至萬元，價格貴過有羅志祥任嘉賓的尾場，是四場之中炒價最高的一場，原因是有謝安琪與張繼聰加持.


姜濤先與謝安琪手拖手合唱國語歌《戀愛達人》，此歌原唱者是羅志祥及小S。謝安琪表示收到姜濤邀請時，感到非常開心，但同時大爆姜濤彩排時不敢正視她一眼，姜濤聞言後即面紅紅害羞的說︰「因為阿聰(張繼聰)喺隔籬，但我真係好鍾意你！」沒想到阿聰隨即升上舞台，更怒啤姜濤說︰「喂！呢個女人邊個嚟？我哋之間點可以有第3個人喺度！」全場起鬨，姜濤即笑謂︰「我唔知佢咁出嚟！好多謝你哋嚟做嘉賓！」阿聰續說︰「佢嚟拖你手，又唔俾飛我，就叫我升上嚟睇你哋拖手！」


姜濤演唱會｜張繼聰陪姜濤度過低潮

之後謝安琪表示不太明白為何邀請她任嘉賓，同時又請阿聰，「佢先頭唱歌又唔望我，我都唔係好明！」姜濤表示一直很想邀請二人，因為《叱咤》之後，他沉寂了幾個月，當時慶幸有張繼聰前輩，阿聰聞言即謂︰「唔好講到咁生疏啦！張繼聰前輩！搞到我八十幾歲咁！」姜濤再答︰「聰哥當時俾好多鼓勵，好開心佢幫咗我好多！」


姜濤演唱會｜張繼聰形容姜濤勤力又善良

阿聰稱在大家眼中的姜濤，是有才華的表演者，打波又勁，然而在他眼中，姜濤是一個勤力又善良的人，心地非常好，「佢仲係一個好年青的人，但佢面對同承受嘅壓力唔係咁多人明白，所以我哋係好愛錫佢同擔心佢，我永遠都好關心你心理！」此時Kay插咀說︰「生理就唔使啦！」阿聰答︰「佢fit啦！你好好望住台下啲人，你第日望手機，見到有人留言攻擊你，唔好為咗一個你見唔到嘅人唔開心，你要記住在場呢啲人！」


謝安琪感激姜濤幫忙

Kay續指心痛姜濤因為自我要求很高，並重提跟他在《叱咤》一起彈琴的往事，「嗰年我哮喘，食藥食到手都震晒，姜濤好好，嗰時又唔識佢，但佢好配合演出，本來由合唱變成加入彈鋼琴部份，之後因為佢唔識彈琴，於是設計咗少少幾好玩、對佢唔識彈琴都彈到嘅，但佢都係要返去練習嘅。本身首歌係一人唱一半，佢又要唱晒成首，嗰隻仲要係我當時嘅新歌，佢好努力去記晒(歌詞)，我真係好感激佢！一個咁重要演出，係佢幫咗我！」謝安琪與張繼聰為姜濤打氣之後，Kay及姜濤就把舞台交給阿聰唱《半江紅》。