早前MIRROR公布喺2024年舉行世界巡迴演唱會，地點遍佈英國美加同星馬。MIRROR巡迴英國站主辦單位尋日公布演出詳情，2場演出分別喺3月12及14日喺倫敦及曼徹斯特舉行。票價由78至268英鎊不等（兌港元約$780至$2680）。對比明年1月舉行嘅香港站演出最貴飛（＄1480），英國站嘅最貴票價差唔多係香港一倍。而MIRROR英國演唱會2場門票將於明年1月10日進行優先預訂，1月12日公開發售。


值得一提係2場演出分別喺倫敦The O2 及曼徹斯特AO Arena舉行，各場館最多可容納約2萬人，屬於當地大型演唱會首選場地。今年10月林家謙就喺The O2 開演唱會，而陳奕迅2012年喺The O2 舉行嘅個唱，就成為場館史上首位舉行售票演出嘅華人歌手。