MIRROR隊長Lokman、Alton、Frankie同Tiger嘅第一首單飛同日派台，亦標誌住MIRROR 12子經過5年，終於全部人都有solo。MIRROR喺團體同solo之間嘅平衡有獨特軌跡，5年來有以下幾個階段。


1) 初出道主打團歌，回首5年前嘅香港，冇乜人聽廣東歌，MIRROR 帶住《全民造星》嘅氣勢，雖然12子已各有粉絲，但得幾個月貨仔，單打獨鬥難成氣候，公司聰明地用捆綁式銷售，走出一條血路。


2) 做團成功亦成為之後嘅致命傷：人多，成本高一大截，好似將會舉行嘅巡迴演唱會，其他歌手連工作人員，十幾廿個人起行，MIRROR就近100人。所以繼續齋做團好難做得大，必須開始搞單飛。


3) 搞單飛又放唔低個團，同日出solo呢招唔係新事物，首輪單飛姜濤同Ian都係一齊出，仲要一隻叫《一號種籽》，一隻叫《二期大樓》；2020年，4年一次嘅2月29日，Anson Lo、AK同Jer亦各自出咗首隻單飛，呢種出solo 而又不失MIRROR連繫嘅招數，既滿足到本命粉絲，團粉亦開心。


無論係日本嘅AKB，定係韓國嘅BIGBANG、BLACKPINK，都係大部分力做團，MIRROR呢種咁獨特嘅做法，都係因應香港咁獨特嘅市場(即係細)孕育出來。但亦無可避免造成獨特嘅問題，就係又團又單飛，多產好易令外界注意力分散，唔止市場，同行都唔會容許你哋個個出solo都紅，物理現象嚟㗎大佬。解決方法其實好簡單，一係只出團歌唔單飛，一係集中最紅嘅三四個有單飛，但你估各人fan club會唔會放過「生啤」？炸爆佢都似。


MIRROR最後四子都出solo，佢哋公司仲喺前一晚出咗條片講團隊精神，用返隊長Lokman喺叱咤嘅說話，「2023年好多個我，但好少我哋；2024年希望可以一齊為大家、為鏡粉做更加多嘅作品。」 我覺得，佢哋公司愈來愈感情用事，唔理回報率，發不可能嘅夢：夢想又加大團隊投資，同時又尊重每個成員同fans對本命嘅愛，兩樣都唔想放棄。


到底我應該讚佢哋勇敢，定話佢哋太幼稚？