楊丞琳Rainie香港演唱會

楊丞琳Rainie要嚟香港開演唱會喇！佢接受咗TVB娛樂新聞台《StarTalk》嘅許文軒訪問，話今次隔咗成7年再嚟香港開show，真係等到頸都長埋！Rainie話：「嘩，等咗7年咁耐，嗰陣我33歲啫，依家都40歲喇！今次我仲做埋總策劃，落咗好多心機㗎！個舞台唔會覺得好舊，你依家睇都仲覺得好新潮㗎！個舞台又大又複雜，好似個魔術方塊咁，可以轉嚟轉去，入面有跳舞、有演戲，仲有情歌同Rock歌，總之咩類型都有，呈現唔同面向嘅楊丞琳畀大家睇。如果今次巡迴演唱會嚟唔到香港，我真係覺得好可惜。我知道好多fans已經等唔切，飛咗去其他地方睇演唱會，使咗好多錢買機票，今次可以喺香港開，我真係超級開心！」

為咗呢個巡迴演唱會，Rainie仲勁操馬甲線添！佢話：「我對自己好有要求㗎嘛，不過都仲覺得唔夠fit。成個巡迴演唱會我都食得好少，因為開場嗰套衫要好fit先得㗎！我平時做咗好多變態（即係瘋狂）嘅運動，食嘢都變態（瘋狂）咁少，依家一日一餐咋，大概一個拳頭咁大嘅蛋白質，兩個拳頭咁大嘅素菜，澱粉質就得半個饅頭咁少。不過我都慣咗22個鐘頭唔食嘢都唔肚餓喇，但係我好掛住香港嘅甜品、瀨尿蝦同橋底辣蟹呀！呢啲全部都冇得食，我要同自己講要專心做個演唱會，着靚衫，所以要犧牲吓！同時都要小心保護把聲，好驚會感冒，平時都要戴口罩，不過做運動可以增強免疫力嘛。」

Rainie仲應承咗fans，喺香港演唱會一定會唱廣東歌㗎！佢話：「我有個習慣，就係每次喺香港演出，無論係細show定大show，我都會準備定廣東歌。廣東話係我生命嘅一部分嚟㗎，細個嘅時候爸爸就教我講廣東話，我爸爸媽媽都係廣東人嚟㗎嘛。雖然我唔係講得好好，但係我都覺得廣東話同我好close。依家我覺得自己退步咗好多，平時都冇乜機會練習，就算同媽咪都好少講，所以我要學唱廣東歌，令自己嘅廣東話進步吓。」

佢仲話：「我有一首廣東歌一定要唱，就係由林家謙作曲嘅《我不認識你》，呢首歌我喺香港未唱過㗎！上次香港演唱會我唱過佢作曲嘅《矛盾一生》，覺得好好聽，所以我喺網上私信佢，搵佢幫手作曲，廣東版係佢推薦我唱㗎！除此之外，我今次仲特登問咗啲朋友，揀咗近10年香港最紅、最受歡迎嘅歌，再搵啲適合自己聲線嘅廣東歌嚟唱。」嘩，真係好期待呀！