草蜢演唱會2026終極懶人包｜40周年紅館7場騷！寵粉區＋打Call密令全面睇

香港殿堂級跳唱天團草蜢，由蔡一智、蔡一傑、蘇志威三位組成，1985年成軍，至今已經邁向第41個年頭！為咗慶祝呢個重要里程碑，草蜢宣布舉行《GRASSHOPPER THREE IN LOVE CONCERT 草蜢演唱會2026》，選址喺最具標誌性嘅紅磡香港體育館（紅館）。

今次演唱會原定開6場，由於反應熱烈，主辦方決定加開4月26日一場，合共7場演出，由4月26日開始，橫跨至5月3日。

無論你係由《忘情森巴舞》年代開始追捧嘅「元老粉」，定係因為近期Cantopop熱潮先認識佢哋嘅「嫩粉」，今次演唱會都係一個唔可以錯過嘅盛事！今次編輯部就同你全方位整合草蜢演唱會2026嘅所有資訊，由演唱會亮點到入場須知，逐樣同你拆解！

演唱會詳情一覽｜日子、票價、場次全面睇

先同大家重溫一下今次演唱會嘅基本資料：

項目	詳情
演唱會名稱	GRASSHOPPER THREE IN LOVE CONCERT 草蜢演唱會2026
演出日期	2026年4月26日（加場）、4月28日至5月3日（共7場）
時間	晚上8時15分
地點	紅磡香港體育館（紅館）
票價	HK$1,280 / $780 / $580

「THREE IN LOVE」呢個主題，正正代表草蜢三子互相緊扣、不離不棄嘅精神。佢哋早前喺記者會上以「婚禮」形式登場，手拖手進場、交換戒指、切蛋糕，仲獲老闆送贈金器，場面溫馨又搞笑。佢哋仲透露有意申請健力士世界紀錄——「不用樂器、全世界最長壽跳舞組合」，真係香港嘅驕傲！

演唱會亮點一｜$780寵粉區有驚喜互動！

講到今次演唱會最令人興奮嘅消息，莫過於草蜢公布：$780票區將會成為「寵粉區」！

草蜢透露，因為今次嘅舞台設計比較特別，$780區域將會設有驚喜互動環節，體驗可以媲美$1,280嘅貴價門票位置。換句話說，買唔到貴飛或者唔想企足全場嘅朋友，$780飛絕對係性價比之王！

除咗$780區有專屬互動之外，草蜢亦會延續「草蜢傳統」，同全場觀眾一齊玩人浪，甚至由紅館最高處玩到落地面嘅「瀑布」效果。蔡一智仲搞笑咁提醒觀眾：「入場前記得拉筋做熱身！」因為真係會玩到好癲。

演唱會亮點二｜打Call密令＋Dress Code

草蜢喺Fans聚會中，向全場觀眾下達咗「打Call密令」！

蔡一智話：「今年入場睇紅館『THREE IN LOVE 草蜢演唱會2026』嘅觀眾，當草蜢唱〈永遠愛著你〉，你哋就拖住隔籬嗰位觀眾，無論識唔識，都拖手和舉起手大合唱，大家記住我哋今年嘅暗號，讓成個紅館充滿LOVE！」

蔡一傑仲搞笑咁預言，單身嘅粉絲可能會因為咁而「拖出好姻緣」，甚至話希望自己都可以喺演唱會上「脫單」！

至於Dress Code，蘇志威就溫馨提示入場觀眾，希望大家衣著打扮以紅色、粉紅色「喜慶」色系為主，配合演唱會嘅「愛」主題。

演唱會亮點三｜周邊商品首度曝光

草蜢早前喺蔡一傑嘅YouTube頻道開直播，同粉絲傾足兩個鐘，期間首度曝光多款演唱會周邊產品！

今次嘅周邊產品非常豐富，包括：

• 紅色圍巾
• 白色Tee（另有粉絲瘋狂要求嘅黑色心形圖案Tee，草蜢已表示會考慮加印）
• 多色文件夾
• 彩色掛飾
• 水晶球（被草蜢稱為「吉祥物」，因製作繁複及成本高，只會非常限量發售）

除咗傳統周邊攤位，現場更加設有夾公仔機同扭蛋機，肯定會掀起另一輪排隊潮！有粉絲已經揚言要改機票提早嚟香港打卡同買周邊，可見草蜢嘅魅力沒法擋！

演唱會亮點四｜宣傳攻勢全面升溫

為咗迎接演唱會，草蜢嘅宣傳攻勢亦全面升溫！

銅鑼灣、尖沙咀、旺角等港九多個地點，合共十個LED幕牆都會播放草蜢嘅MV及廣告，俾粉絲打卡拍照。仲有草蜢海報巴士走勻全港，粉絲隨時喺街頭野生捕獲！

草蜢三子呼籲粉絲踴躍打卡，一齊慶祝佢哋成軍40周年呢個重要里程碑。

演唱會亮點五｜草蜢突襲Fans戲院聚會

喺演唱會倒數不足一個月之際，草蜢三子驚喜現身尖沙咀K11 ArtHouse MCL戲院，出席Fans包場睇之前「RE：GRASSHOPPER CONCERT 草蜢演唱會」Blu-ray嘅聚會。

蔡一智話：「草蜢今次到戲院唔係睇電影，係睇我同二少（蔡一傑）花咗好長時間去剪輯，啱啱推出嘅Blu-ray碟。戲院大銀幕呀！草蜢好少拍電影嘛，能夠上戲院真係一件開心事！」

Fans自發包場喺戲院睇演唱會，令草蜢好感動，蔡一智話：「粉絲們好錫草蜢，非常多謝草蜢嘅『Framily』（如家人般的朋友），所以我哋要驚喜現身！」

蔡一傑話：「睇大銀幕，好好Feel，像睇4D！」蘇志威就話：「現場尖叫聲大過戲院音響，厲害！」

歌單預測｜元老粉回憶殺＋GenZ專屬歌單

雖然官方尚未公布完整歌單，但根據草蜢早前嘅訪問，今次演唱會將會兼顧新舊粉絲：

• 「元老粉」回憶殺：《忘情森巴舞》、《失戀陣線聯盟》、《寶貝對不起》、《Lonely》、《世界會變得很美》、《永遠愛著你》等經典金曲肯定走唔甩！
• 「嫩粉」專屬歌單：草蜢特別為GenZ年輕樂迷炮製「沉浸式香港的士高」專屬歌單，誓讓全場「all in跳到盡」。蔡一智笑說：「想體驗『沉浸式港的士高』嘅朋友，今年四月，你發達啦，有草蜢陪你！」

蔡一傑笑言出道40年精選作品眾多，難以取捨：「真係唔知唱邊啲歌好，𠵱家粵語歌大熱，我哋嘅歌完全中晒所有朋友嘅心，可以一齊玩，一定非常開心。」

草蜢更透露每場都會有驚喜歌單，讓粉絲如拆盲盒般充滿期待！佢哋原本想加開日場唱Side Track歌曲，可惜技術上有難度，被經理人林珊珊拒絕咗。

嘉賓陣容｜重量級嘉賓賣關子

至於外傳草蜢每場會有特別嘉賓，蘇志威大賣關子，話：「總之每個都係重量級！」

草蜢喺圈中廣結人緣，早前記者會上已有周潤發、古天樂、任賢齊、張學友、林峯、張智霖、陳小春、陳慧琳、楊千嬅及Tyson Yoshi等老中青三代藝人好友拍片恭賀。究竟邊個會真係現身紅館舞台？大家入場就知！

海外巡演｜新加坡係海外首站

香港站之後，草蜢將會展開海外巡演，新加坡係海外首站，將於2026年6月20日喺新加坡室內體育館舉行。

草蜢同新加坡緣分頗深，蔡一智1996年喺室內體育館開唱時扭傷腳，最後要由舞蹈員背落台；蘇志威記得有一次新加坡演唱會，因為觀眾太熱情，結果安可咗五次！唔知今次香港站又會有咁熱烈嘅反應呢？

入場須知｜輕裝上陣＋記得拉筋

成功買到飛之後，仲要留意以下入場安排：

• 輕裝出席：紅館鼓勵觀眾盡量避免攜帶大型手提袋或背包，無袋觀眾可使用特快通道。
• 安檢程序：所有觀眾進場前須進行金屬探測器檢查。
• Dress Code：記得著紅色和粉紅色服裝入場！
• 拉筋熱身：草蜢預告全場會玩人浪甚至「瀑布」，入場前記得做足熱身，準備好又唱又跳！
• 打Call密令：當草蜢唱〈永遠愛著你〉時，記得拖住隔籬觀眾嘅手一齊大合唱！
• 兒童入場：1.2米以下兒童謝絕入場，1.2米以上需憑票入場。 交通懶人包｜點樣去紅館最方便？

紅磡香港體育館位於九龍紅磡暢運道9號，交通非常方便：

• 港鐵：東鐵線／屯馬線紅磡站，D6出口直達紅館。
• 巴士：紅磡站巴士總站有多條巴士路線，來往港九新界各區。
• 的士／Uber：紅館正門設有的士站。

散場提示：演唱會約晚上11時15分結束，紅磡站屆時會非常繁忙，建議預先規劃好回程路線。

總結｜4月紅館見，一齊忘情跳到尾！

草蜢成軍40周年，《GRASSHOPPER THREE IN LOVE CONCERT》絕對係2026年香港樂壇其中一個最令人期待嘅盛事。由$780寵粉區驚喜互動，到全場拖手大合唱嘅打Call密令，再到紅色粉紅色嘅Dress Code，草蜢準備好同大家一齊創造一個充滿愛同歡樂嘅晚上！

草蜢三子每日跑步做Gym練歌跳舞，以最佳狀態迎接紅館舞台。佢哋視今次演唱會如一場畢業禮，要同粉絲一同慶祝呢個盛典。

約定大家，4月26日紅館見！著住紅色粉紅色，記住打Call密令，一齊同草蜢忘情跳到尾！

「願記住草蜢，彈跳於激光中；草蜢，彈跳於心窩中！」