BIGBANG瞓身玩遊戲 勝利想香港買樓呻貴

韓國天團BIGBANG由前日起,一連3日喺亞博館舉行4場「2016 BIGBANG MADE [V.I.P] TOUR IN HONG KONG」,今日仲連續開兩場,分別喺晝就2點半同晚上7點開騷,而BIGBANG嚟香港開騷前一日先完成內地中山場,真係可以話BIGBANG係冇得休息就直接演出,心疼死粉絲!

BIGBANG喺香港開騷都吸引唔少香港藝人到場睇騷,今日晝就場有張柏芝撐場,亞姐張家瑩就孖友人去睇夜晚場,問到佢最鍾意邊位成員,佢話咁多個都ok,不過就被友人踢爆佢可能分唔到五名成員。而今日晏畫場時,G-DRAGON(GD)同粉絲現遊戲時畀粉絲偷襲!女粉絲扮同GD講嘢之後突襲喺GD塊臉錫咗一啖,令全場粉絲立即鼓譟,GD隨即怕醜遮瞼,成員太陽更表示GD喺舞台上係第一次畀粉絲錫,笑言GD今次獻出佢嘅第一次。同之前3場一樣,BIGBANG現身後先抽幸運粉絲同佢哋一齊玩遊戲,之後先再表演。而第一個遊戲就由T.O.P贏咗勝出,第二個遊戲就係couple basketball,各人用粉絲一組,而勝利就用廣東話問自己個拍檔:「你叫咩名?」,發音相當標準,反而抽中嘅係內地女粉絲,粉絲就用普通話回應。勝利亦一直撩女粉絲跳舞,又用廣東話叫佢:「加油!」見到偶像拖晒手仔咁,台下粉絲仲唔叫到拆天?BIGBANG五子玩遊戲時都相當落力,GD接公仔時更瞓哂地,之後又跟粉絲擊掌,互相鼓勵。勝利喺隊中出名搞鬼,隊友玩遊戲時,佢喺旁邊會突然唱:「my angela my baby my angela baby。」令全場爆笑。而粉絲一上台五子就鬥放冧女招,GD更為粉絲戴公仔帽,又攬頸自拍,令台下粉絲相當羨慕。雖然勝利喺隊中出名搞鬼,但其實其他成員都唔差,被粉絲喻為「4次元」(成日有奇怪諗法)嘅T.O.P喺玩遊戲時就用咪扮切手指送俾粉絲,粉絲都唔知應該開心好定唔開心好。玩完遊戲之後,成員再逐一跟粉絲打多次招呼。盛傳今年或明年入伍嘅T.O.P表示:「今晚係(香港騷)最後一場,唔知幾時可以再見大家,希望大家今晚盡興。」之後BIGBANG表演《BANG BANG BANG》、《Loser》、《If You》等多首人氣歌曲。活動結束前,成員用英文輪流冧港迷,GD帶頭表示:「Show me how much you love us. So sweet. I love you guys.」勝利用英文表示:「我好愛香港美食,不過我更愛香港人,香港嘅女仔。」太陽叫勝利喺香港住,勝利表示:「我都好想喺香港買樓,不過!真係好貴!Shxx!但GD就可以(買)。」連勝利都呻香港樓價高。之後BIGBANG大唱代表作《Fantastic Baby》,台下粉絲即跳住又唱又跳,氣氛熱烈,同時大嗌唔捨得完騷,勝利用廣東話同港迷講:「你可以返屋企啦。」太陽就話:「Bye Bye勝利。」再次叫勝利喺香港買樓住,非常搞笑。